z. Hd. der 68. GV vom 26. Januar 2018

 

• Beloonig für d‘Chränzli-Turner

Die 12 schteirische Chnocheschüttler vom Turnerchränzli…

Händ planged uf de Zämmezug mit läärem Ränzli !

Zur Belohnig gits kein Bluemestruus….

Nei mir gnüüsed en Schmuus, im Oerliker Schnitzelhuus !!

 

• Aabigwanderig

30 Turner wanderet schtill und bedächtig i de Nacht…

Und gnüssed uf em Opfiker-Platoo die wunderschöni Liechterpracht !

Aaschlüssend wird dänn gschnäderet und lamentiert…

Zum Schluss wird im Frohsinn wird no es Waldfäscht offeriert !!

 

• Samariterkurs

D’Turnleiter händ sich entschlosse kurzerhand…

mir mached en Defi-Kurs im Unterland !

D’Samariterinne Elke und Karin hän öis gschluuched i de Herzmassasch…

Mir händ öis aber guet gmetzget ohni grossi Blamasch !!

 

• Nüme Bowling, jetzt Petang:

Wäge Spagatversüech uf em Iis und unkontrolliertäm Abgang…

Hät d’Spielgruppe gwächslet jetzt uf Kiis und em Petang !

D’Beteiligung isch cheibe lässig…

bim Waldfäscht nachär sind dänn alli gfässig !!

 

• Sommerolympiade und Jubifiir

Die 15 Jubilare werdet vertwöönt nach Schtrich und Fade…

Mit ihrem Biitrag tüend si au no di reschtliche Turner iilade !

Das Fäscht ändet füecht fröhlich und rund…

Wär da nöd leider no am Erich siin Schlüsselbund !!

D’Cheerichtsäck werdet drüümal durchgsuecht, sofort und no chli später…

Dänn jede isch en mögliche Täter !!

 

• Aagebot i de Summerferiä

Doch s’Läbe gaht wiiter - im Summer mit Wandere und Velotuure..

Mir händ entschide, mir mached Sport und gönd nonig go kuure !

Als Turnleiter muesch du Turner immer aatriibe…

Dass si nöd immer nu düend diheime bliibe !

Du bisch somit immer im Spagat…

Muesch immer luegä was no so alles gaht !!

 

• Turnfaart

Di ganzi Schwiiz reist as Open-Air uf Glattbrugg…

30 MRO-Turner aber gönd an Bahnhof-Marathon und lönd nöd lugg !

Dur die halbi Schwiiz, de Furka bis uf Oberwald…

Hät passt für alli, für Jung + Alt !

Dä Gommer-Höhewäg zeigt dir dänn Gränze uuf…

Das gseesch am verschwitzte Liibli, das merksch am schnälle Schnuuf !

Am Aabig dänn im uuralte Hotel goldige Chrüüz lömmer öis verwööne…

Da hätt aber au gar keine me en Grund zum chlööne !

Wider e super Bergfahrt gaaht i Gschicht…

Hoffentlich cha ni no lang mittmache, am liebschte ohni Gicht!

 

• Technischi Exkursion und Raclettaabig

Di technischi Exkursion bringt öis is Chischte-Museum vo de Stadt Züri…

Det hämmer e super Füerig gnosse, vom Polizeier Brönnimann, dem Schnurri !

Am Aabig dänn im Turnerhuus…

Isch no gsii de Raclette-Schmuus !!

 

• Vorschtandsässe

Das hämmer ja fascht vergässe, öises erwiiterete Vorschtandsässe !

Mit Turnleiter und wichtigi Hälfer simmer gsii im Mamma Mia in Opfikon…

S‘Ässe hämmer richtig gnosse Ton um Ton, jetzt müemer no zu Amplifon!

s’Trinke hät dänn jede sälber berappäd…

mä hät ja schliesslich es Büdschee, hät aber super klappäd !!

 

• Chlausaabig im Forum

D’MRO düend Tradizione zelebrierä…

De Heinz und dä Kari düend da vill Ziit inveschtierä !

Sehr villi „jungi“ + alti MRÖ’ler gnüüset dä alti Bruuch…

mit Nüssli, Schöggeli und Mandarinli füllt mer sich de Buuch !!

• Letschte Turnaabig im 2017

Grosse Ufmarsch bim letschte Turnevent…

Jede isch da, keine verpennt !

Jede git alles, die einte no mee…

Das isch de Gruppezwang, duet erscht spöter e chli wee !

Üebige mit em Therraband wäred gässe, Koordination chasch grad vergässe…

Ich bin mir sicher, „die Gwenda“ werdet mir nie vergässe !!

 

• Schlussaabig im Vereinshuus

Und wider isch es Jaar verbii…

Und meischtens isch es lässig gsii !

Im Turnerhuus isch es e chli chalt…

S‘Turnerhuus isch halt au scho ziimli kaputt und alt…!!

E nöii Chochmannschaft isch am Rueder…

S’git Spagetti-Plausch, aber mit riisigi Fueder !

De Ueli, Kurt und Ruedi verwööned di grossi Turnerschaar…

Ville Dank, isch das nöd wunderbaar !!

 

• Abschiid

Ich han die Ziit mit öi sehr gnosse i all dene Jahre…

Es hät würklich Spass gmacht das alles z’erfahre !

Jetzt bliibt mir als Obmann nümme vill Ziit…

Ich mache s’wichtige Danke a miini Hälfer – das mit vill Schpiid !

Kari, Heinz,Ueli, Fredy und Patrick, miim ganze Vorschtand ville Dank…

Ich glaube mir händ immer gfunde, de gueti Rank !

André, Martin, Patrick und Ueli händ Turner träniert uf höchem Nivoo…

Ich hoffe, ihr mached das no lang es sooo !

Em Erich, Gilles und all dene unverzichtbare Hälfer sei Dank…

Wäge öiene Taxifahrte und und Hilfeleischtige findet mir fascht immer de Rank !!

 

Ich wünsche miim Nachfolger alles Gueti vill Erfolg und Pfiifeholz…

(nu wägem Reim!)

Ich bin es MRO-Mitglied und das macht mi schtolz !!

 

Öie Obmann, Heinz Hafner