Diese Seite drucken
Sonntag, 03 September 2017 09:03

MRO BERGTURNFAHRT GOMS 2017

MRO-Turnfahrt Goms August 2017

Morge früe wänn d’Sunne lacht…

die 26 Männerriegler sind zum Glück alli vertwacht!

Für e bunti guetgluunti Truppe us Opfkion…

fangt jetzt a de Bahnhof-Marathon!

Ufe, hindere, abhocke, ufstah und nöd umeeckle…

Stäge abe, Stage ufe, Grind abe und seckle!

Nach föif mal umstiege oder so…

isch ändli Oberwald choo!

Kafi und Gipfeli organisiert vo öisere Leitig…

da bliit no Ziit für die letschi Vorbereitig!

Jetzt trännt sich d‘ Spröi vom Weize..

di eine düend wandere… die andere gönd i Beize!

Das isch natürli nu wägem Reim..

bliibt unter öis, isch alles geheim!

Ufe, Abe, Treppe marsch…

oh läck mer doch am A…!

Lärche, Blueme, Pilz - wau, isch das mega heiss…

öis lauft abe de Schweiss!

Dank em Turne sind mir im Alter no so zwäg…

und chönd gnüüse dä schöni Gomser-Höhewäg!

Am Abig dänn… acho im Hotel…

warted öisi Turnerfründe scho bime Bierli hell !

Sii händ de Rottewäg gmeischteret…

und sind alli sehr begeischteret.

Das, liebi Lüt isch kein Witz…

gliichi Distanz eifach ohni de Spitz!

De ganzi Tag Sunneschii, tröchnet di uus - das isch bitter…

bim Bierli uf de Terrasse vom Poschtli - chunnt dänn s’Gwitter!

Abigässe und Zmorge, es isch en riese Hit…

uusgläse händ’s d’Organisatore z’Dritt!

D’Wanderig am Sunntig gaht au dur Feld und Wald…

am Abig landet mir in Niederwald!

Nach zwei Täg wandere simmer ziemli dure…

jetzt nur no hei… und dänn go chnurre!

Mir händ die Turnfahrt würkli gnosse…

leider isch d’Ziit so schnäll verflosse!

Ville Dank, Kari Martin und Erich, öisene Organisatore…

jetzt händer ändli nümme so vill um d’Ohre!

Heinz Hafner